اللعبة فيها 104 ورقة مقسمة على 12 نوع.
قبل اللعب
- لازم عددكم يكون من 2 إلى 6 لاعبين.
- اختاروا لاعب يكون هو الموزع ويعطي 5 أوراق لكل لاعب. خلوا الورق الباقي في نص مكان اللعب وتكون أوراق للسحب.
- واحد منكم يأخذ أعلى ورقة من أوراق السحب ويحطها جنب أوراق السحب وهذا بيكون مكان لرمي الأوراق.
- كل واحد يخلي قدامه مساحة فاضية علشان تبني ثروتك.
- اللاعب الي يمين الموزع هو الي يبدأ اللعب.
مصطلحات لازم تعرفها
1 - سلعة: كل الأوراق ما عدا الذهب والفضة.
2 - ثمينة: ورق الذهب والفضة.
3 - مجموعة: ورقتين من نفس السلعة (أو سلعة + ثمينة).
4 - ثروة: كومة ورق مكونة من مجموعة وأكثر.
5 - حوّش: سرقة مجموعة من لاعب ثاني.
طريقة اللعب
في دورك لازم تسوي حركة وحدة من هذي الحركات:
1- تبني مجموعة
2- ترمي ورقة
3- تحوّش مجموعة لاعب ثاني
1 – كيف تبني مجموعة؟
تقدر تبني مجموعة بثلاث طرق:
- مجموعة من ورقتين متشابهة من الأوراق الي في يدك. (مثال: سيارة + سيارة)
- مجموعة من ورقتين متشابهة تكون ورقة من يدك والورقة الثانية مرمية. (مثال: دباب من يدك + دباب مرمي على الأرض)
- مجموعة من نفس الطريقتين الي ذكرت لكن تكون وحدة من الأوراق ثمينة*. (مثال: سيارة + فضة)
*ملاحظة: لازم الورقة الثمينة تكون تحت ورقة السلعة الي بنيت فيها المجموعة علشان الي ضدك يعرفون سلعة المجموعة.
الزبدة: تقدر تبني مجموعة من ورقتين من نفس السلعة، أو ورقة سلعة وورقة ثمينة.
ولكن ما تقدر تبني مجموعة من ورقتين ثمينة، أو مجموعة أكثر من ورقتين. آخر شيء، ما تقدر تدمج مجموعة مع مجموعة ثانية حتى لو كانت من نفس السلعة.
كيف تنمي ثروتك؟
تنميها عن طريق لعب مجموعة فوق مجموعة
وعلشان تفصل كل مجموعة عن بعضها في ثروتك، كل مرة تضيف مجموعة جديدة لازم تحطها على المجموعة.
وإذا بتحط مجموعة ثانية، لازم تحطها بالعرض، ولما تحط مجموعة بعدها لازم تكون بالطول وهكذا. الهدف أن اللاعبين الثانيين يعرفون أنت وش موزي تحت مجموعتك الي في الوجه.
2 - رمي ورقة
إذا ما تقدر تسوي مجموعة في دورك، أرمي ورقة من يدك على الأوراق المرمية وأنهي دورك.
3 - تحوّيش مجموعة من لاعب ثاني
أعلى مجموعة في ثروة أي لاعب (المجموعة الي في الوجه) مهدده بالتحوّيش من أي لاعب ثاني. علشان تحوّش مجموعة لاعب ثاني، حط بطاقة سلعة نفس المجموعة الي تبي تسرقها أو ورقة ثمينة قدام اللاعب المستهدف.
ملاحظة: بطاقات السلع والثمينة لها نفس القوة في التحوّيش (قيمة السلعة تفيدك في تحديد الفايز بالنهاية).
اللاعب المدافع الي صار عليه حركة تحوّيش يقدر لو بغى يدافع عن محاولة التحوّيش ويحط بطاقة مماثلة للمجموعة المستهدفة أو ورقة ثمينة على ورقة اللاعب المهاجم، اللاعب المدافع والمهاجم يقدرون يتنافسون على نفس المجموعة إلين ما أي واحد فيهم يوقف أو تخلص أوراقه.
لما اللاعب المدافع ما يقدر يدافع أو أنه يقرر أنه ما يدافع، ينجح المهاجم بالتحوّيش ويأخذ المجموعة الي حوّشها ويضيفها لثروته، وتكون المجموعة الي في الوجه (وتشمل الأوراق الي انلعبت في الدفاع والهجوم). لو اللاعب المدافع نجح في الدفاع فيخلي مجموعته عنده وأي ورقة انلعبت في الدفاع أو الهجوم.
(تذكير: اي ورقة ثمينة انلعبت خلال الهجوم والدفاع ما تكون هي الورقة الي في الوجه).
مثال: خالد حاول يحوّش على مجموعة سيارات محمد بأنه يحط سلعة سيارة قدامه، محمد رد الهجوم بأن يحط ورقة ذهب على ورقة خالد، ثم رد خالد وحط ورقة سيارة على ورقة محمد، توهق محمد وطلع ما عنده أي سيارة أو ورقة ثمينة في يده وبكذا خالد يفوز بالهجوم ويحوّش على المجموعة (4 أوراق سيارة وورقة ذهب) ويضيفها لثروته.
قاعدتين إضافية تنطبق على التحويش:
- أول مجموعة في ثروة أي لاعب محمية ومحد يقدر يحوّشها.
- قبل ما تحاول تحوّش على مجموعة لاعب ثاني لازم يكون عندك مجموعة وحدة على الأقل.
نهاية دورك:
بعد ما تسوي حركة وحدة من الحركات الثلاثة الي ذكرناها قبل:
- اسحب أوراق من أوراق السحب لين ما يكون في يدك خمس أوراق.
- بعد ما تسحب، إذا لاعب ثاني أستخدم أوراق علشان يدافع عن مجموعة في دورك، يسحب ورق لين ما يكون في يده خمس أوراق.
- بعدها ينتقل الدور إلى الاعب الي يمينك.
نهاية اللعبة
لما يخلص ورق السحب، اللعب يكمل إلين ما كل اللاعبين لعبوا باقي الأوراق الي في يدهم، طبعا كما هو موضح قبل، ما تقدر تعدي دورك من دون ما تسوي أي حركة. إذا ما تقدر تبني مجموعة أو تحوّش على مجموعة لازم ترمي ورقة من يدك.
حساب الثروة:
كل سلعة لها قيمة نقدية
الفايز هو من حوّش على أكبر ثروة في النهاية بأنه جمع السلع المختلفة.
مثال:
اللاعب الأول خالد
عنده 3 أوراق سيارات و1 ورقة أرض و3 أوراق تلفون.
السيارة الوحدة قيمتها 15 ألف.
والأرض 20 ألف.
والتلفون الواحد 5 ألف.
نضرب عدد السلعة مع قيمتها.
3 سيارات ضرب 15 ألف = 45 ألف
1 أرض ضرب 20 ألف = 20 ألف
3 تليفونات ضرب 5 ألف = 15 ألف
(45 + 20 + 15 = 80 ألف)
بيكون المجموع 80 ألف.
الاعب الثاني محمد
مجموع ثروته 60 ألف.
خالد يفوز باللعبة لأن مجموع ثروته أكثر من محمد.
قواعد محترفين
ننصحك تلعب بهذي القواعد لما تتعلم القواعد الأساسية:
- وزع على اللاعبين 6 أوراق بدل خمسة في بداية اللعبة، وبعد ما ينتهي دور كل لاعب يسحب ورق لين ما يكون عنده 6 أوراق في يده.
- كل اللاعبين يقدرون يسوون حركتين بدل حركة وحدة. الحركة الثانية اختيارية، إذا ما تبي تسوي حركة ثانية قل أنهيت دوري.
- إذا حاولت تحوّش مجموعة لاعب ثاني وخسرت، ما تقدر تحاول تهاجمه مرة ثانية إلا في دورك الجاي.
- إذا رميت ورقة كأول حركة لك، تقدر تسحب ورقة على طول وتسوي حركة ثانية إذا تبي.
- حركة جديدة: طور مجموعة بأنك تضيف عليها سلعة وحدة مماثلة وما تكون ثمينة.
- الذهب يساوي ورقتين: الذهب ينلعب طبيعي في حركة بناء مجموعة زيه زي أي ورقة ثانية لكنه يختلف في حركة تحويش مجموعة. في تحوّيش مجموعة سواء في الهجوم أو الدفاع الذهب يحسب كورقتين، علشان ترد على هذي الورقة (سواء في الهجوم أو الدفاع) تحتاج تلعب ورقتين سلعة، أو ورقتين فضة، أو وحدة سلعة ووحدة فضة، أو ورقة ذهب وحدة، بعدها إذا كمل اللاعبين الهجوم أو الدفاع يرجع اللعب طبيعي بورقة وحدة.
